Mıleto zaza

1

Tae zonaaẋi u kamılê ma bi

İnu coru cae toz rêca ho nêest

İ hosta u şuanê zon u zagonê ma

xısmekarê rae u itiqatê ma bi

İnu dina ho vurnê, na dina ra şi

2

İnu ke dina ho vurnê, na dina ra şi 

dısmên eve zur u zor sıkıt zonê ma

Pıṙdê ke wertê cedi u tornu de bi

dısmên eve aẋuye şasete ho rıznay

Mıletê ma bi ve kengerê verê vay şi

3

Fam nekenê torni dêke u kalıki

Zonê ecnebü de vanê hesnenê

Vıleçewtê, sareşiyaê kalıki u dêki

Tornunê ho de niya danê bervene

Zon ke şi, tornu kılıt kerd vindi

4

Pirê rae, şuanê mıletê ma ke şi

itiqatê ma kewt ra dısmên dest

Bonê cemi kerdi ra, itiqat vurna

Nıka tırki venga haq u oli danê

Mıleti kenê tırk, şaset kerdo itiqat

5

Anqara eve şaseto zurekero qılerın

elevünê ma xapnena verdana sunnü

sunnünê ma xapnena verdana elevü

Bıray u wayi zumini rê kerdê dısmên

Dae ra mıletê ma zumin ra heredano

6

Kemere ke hurendiya ho ra qılayiye ra

gındıṙ bena, bena pırtley tıṙ u gerisu ra

Eve hile u zur u zoṙ gonewerunê anqara 

welat vêsna qom surgın kerd itiqat rızna

Ẋeriviye de vıleşiya ro zon u zagonê ma 

7

Vêrg ke zu miye suriye ra bıṙne ra

şikino ke ho rê qırvane ke ro, bo ro

Vergi u heşi kewtê ton u qılafetê ma

Eve şaset xapnenê, ma ra bırnenê ra

ho rê kenê qırvan cenc u cayilê ma

8

Dısmênê zon u zagon u kamiya ma zofê

Huyinê riyê ma de eve dekbaẓêni u hile 

Taê ma ra vanê; sıma tırk u teteriyê xasê

Taê bini vanê; sıma ḳuṙê goçeriyê bazê

İyê bini vanê; sıma hayi u huyiyê ḳanê

9

Kamo ke tari de ro zuru rê rew qan beno

Mıletê ho rê nê, mıletunê binu rê xevetino

Gılveo ke ser rowo, u gılve koçeno, bırneno

Hetê wau u bıraunê ho nê, hetê dısmêni cêno

Eve cayileni toz erzeno rêça dêke u kalıkê ho

10

Dısmên çılê ma sıkıtê, tarıxê ma tari de ro

Ẓê vatena ho mıletê ma rê zu tarıx noseno

Eve hile dêke u kalıkunê ma rê iftıra keno

Şehidunê hiris u heşti her roz reyna kıseno

Dısmên ki vano allax, hama tey iman çino

11

Mıleto zaza ki eve zon u zagonê ho zu mıleto 

Serbeştiye wazeno, daimi verva xıraviye vıneto

Zon u tarıxê zazau ki ẓê koe bisitun qadimiyo

Mıletunê luku hata nıka mıleto zaza inkar kerdo

Anadoliye de hon de ke inkar bi haştiye nêbena

12

Dısmên mıletê ma kerdo gêrın, laşeri zofê çi ber do

Seytano eve zur bonunê zon u zagonê ma rızneno

Fam u fersan u ilim ra sae kerimê raştiya mıletê ma

İlim dina keno roşt, hileu keno puç, ma xelesneno

Sarê ho hawa fiye, lawıku vaze, zofê cêvher to de ro

Hakkı Çimen, Almanya